Gipasaka sa World Health Organization (WHO) ngadto sa “very high” ang kakuyaw sa pagkaylap sa Bundibugyo strain sa Ebola sa Democratic Republic of Congo (DRC) tungod sa paspas nga pagsaka sa mga kaso niini. Kini nga matang sa virus nagpabiling og kabalaka tungod wala pa kini’y aprubadong bakuna o wala pa matino ang tambal sa pagkakaron.
Sa pinakabag-ong tala, moabot na sa 82 ang kumpirmadong kaso sa Congo, samtang aduna na usab duha ka natakdan nga nakasulod sa silingang nasud sa Uganda. Isip dinalian nga lakang, gipatuman sa Uganda ang hugot nga contact tracing ug pagkansela sa mga dagkong panagtigom aron mapugngan ang pagkuyanap niini.
Samtang nagpadayon ang krisis, gisugdan na sa WHO ang pagtuon sa usa ka experimental drug nga gitawag og Obeldesivir isip posibleng panalipod batok sa maong makamatay nga sakit.