Opisyal nang gipahibalo sa VAA Live Inc. nga maghiusa pag-usab ang sikat nga 2000s girl group nga Viva Hot Babes alang sa usa ka reunion concert nga giulohan og “BULAKLAK: Viva Hot Babes Reunion Concert” karong Oktubre 23, 2026 sa New Frontier Theater sa Cubao, Quezon City.
Ang maong konsyerto nga idirek ni GB Sampedro pagapangunahan sa unang batch sa mga miyembro lakip sila si Maui Taylor, Katya Santos, Andrea del Rosario, Gwen Garci, Sheree, Jaycee Parker, Ella V., ug Jennifer Lee, diin gipahayag sa organizer nga aduna pa’y dugang nga mga ngalan nga ipahibalo sa mga sunod nga adlaw.
Human sa pipila ka bulan nga hungihong ug mga teaser sa social media, madasigong giabi-abi sa mga fans ang maong balita diin mapalit ang mga tiket gikan sa P1,500 hangtod P6,800 alang sa usa ka gabii nga puno sa kanta, sayaw, ug paghinumdom sa ilang mga sikat nga hits sama sa “Bulaklak” ug “Kikay”.