Nakabsan sa hinulamang kinabuhi ang usa ka 20 anyos nga drayber sa motorsiklo human kini mapasok ilawom sa usa ka pampasaherong bus sa national road sa Sitio Kabalansihan, Brgy. Sinuda, Kitaotao, Bukidnon, pasado ala-1:00 sa kadlawon kagahapong adlawa.
Subay sa imbestigasyon sa Kitaotao Municipal Police Station, nagikan sa susamang direksyon ang motorsiklo ug ang bus gikan sa Brgy. Sinuda paingon sa Quezon, Bukidnon sa dihang nawad-an og kontrol ang rider ug nalabay ilawom sa bus.
Nakaangkon kini og grabeng samad sa ulo ug gideklarang dead on arrival sa Bukidnon Provincial Hospital sa Maramag human una madala sa Buda Community Hospital sa Marilog District, Davao City.
Matud sa kapulisan, walay suot nga helmet ug walay driver’s license ang biktima sa dihang nahitabo ang aksidente. Sa pagkakaron padayon pa ang imbestigasyon samtang anaa na sa kustodiya sa Kitaotao MPS ang bus ug motorsiklo.