CABANGLASAN, BUKIDNON — Nagpadayon karon ang gipahigayong imbestigasyon sa Cabanglasan Municipal Police Station aron mailhan ang suspek ug matino ang motibo sa brutal nga pagpamatay sa usa ka 82-anyos nga lolo nga napalgang nadugta sulod sa iyang panimalay sa Purok 3, Barangay Anlugan, Cabanglasan.
Sa pakighinabi sa Bombo Radyo Malaybalay kang Cabanglasan MPS Officer-in-Charge PCPT Linomer Caseres, gibutyag niini nga pasado alas 10:50 sa buntag Hulyo 21 nangayo og tabang ang pag-umangkon sa biktima nga si Leon Bangot human nadiskobrehan ang patay’ng lawas niini nga gigapos ang mga kamot sa likod sa ikaduhang pultahan sa usa ka farmhouse, diin gibana-banang lima ka kilometro ang layo gikan sa sentro sa barangay.
Subay sa gihimong pagsusi sa Scene of the Crime Operatives (SOCO), nakaangkon ang biktima og katibuk-ang upat (4) ka samad dinunggaban — tulo sa dughan ug usa sa likod — nga maoy direktang hinungdan sa iyang ikamatay.
Nakuha man tuod sa crime scene ang usa ka sundang ug improvised shotgun, apan gibutyag sa SOCO nga dili kini ang gigamit sa pagpatay tungod kay dili mag-match ang samad sa biktima sa kadako sa maong sundang. Sa kasamtangan, wala pa’y person of interest ang kapulisan samtang nagpadayon ang ilang lapad nga imbestigasyon sa maong krimen.