Unom ka kaso ang dinalian nga napasaka sa Bukidnon Police Provincial Office (BukPPO) batok sa mga nadakpang nagbyahe og smuggled cigarettes sulod lang sa usa ka semana, partikular gikan Hunyo 15 ngadto sa 21.
Sa pakighinabi sa Bombo Radyo Malaybalay kang Police Captain Sheila Joy Jangad, ang tigpamaba sa BukPPO, gipahayag niini nga gipahugtan pa nila karon ang checkpoint ug intelligence monitoring sa tanang utlanan sa lalawigan. Gikumpirma ni Jangad nga dakong hagit kanila ang paggukod sa mga utok sa maong ilegal nga negosyo tungod kay kasagaran sa mga masikop mao lang ang mga drayber ug helper nga nagdumili sa pagbutyag kon kinsa ang tinuod nga tag-iya sa mga kargamento.
Gumikan niini, nakig-alayon na ang kapulisan sa mga lokal nga panggamhanan pinaagi sa Municipal ug City Peace and Order Councils aron hingpit nga mapakgang ang pagkatap sa mga ilegal nga sigarilyo. Giklaro usab sa BukPPO nga wala pa sila’y nakitang lig-on nga timaan nga duna’y organisadong sindikato nga nagpaluyo niini sa Bukidnon, apan andam ang ilang buhatan nga molihok sa higayon nga duna’y makahatag og impormasyon batok sa mga dagkong mambasog sa maong kontrabando.