Giila sa House prosecution panel ang alegasyon sa unexplained wealth isip usa sa pinakabug-at nga basihanan sa impeachment batok kang Vice President Sara Duterte, pinasikad sa mga dokumento ug opisyal nga rekord sa bangko nga ilang gipresentar sa Senado.
Matud ni House prosecution panel spokesperson Robert Ace Barbers, personal niyang pagtuo nga lig-on ang kaso kalabot sa giingong dili maipatin-aw nga bahandi ni Duterte, bisan wala niya kini gipahayag isip opisyal nga baroganan sa tibuok prosecution team.
Lakip sa gipresentar nga ebidensiya sa prosecution ang giingong balik-balik nga pagbalhin sa kuwarta pinaagi sa manager’s checks aron malikayan ang pag-ila sa mga transaksiyon sa kataposan sa tuig, wala matud pa madeklarar nga bahin sa negosyo sa GenCorp, ug ang pagsira ni Carpio sa upat ka safety deposit box nga giablihan niadtong 2019 ug gisirhan niadtong 2025.
Samtang, gipanghimakak sa kampo ni Carpio ang mga alegasyon nga nalambigit kini sa kontrobersiya isip giingong collateral damage. Giawhag usab sa Malacañang ang publiko nga susihon ang mga ebidensiya aron mahibal-an ang kamatuoran.