Gikumpirma sa mga awtoridad sa Norway ang unang kaso sa Europa sa usa ka polar bear nga nataptan sa avian influenza o bird flu, human nadiskobre ang H5N5 strain sa Svalbard region sa Arctic.
Sumala sa Norwegian Veterinary Institute, nakit-an niadtong Mayo ang patay nga baye nga polar bear nga gibana-bana nga usa ka tuig ang edad, kauban ang usa ka walrus sa nagyeyelong kapupud-an nga duol sa North Pole.
Sa laboratoryong eksaminasyon, napamatud-an nga positibo sa H5N5 variant ang mga sample gikan sa duha ka hayop.
Matud ni Ragnhild Tonnessen, bird flu coordinator sa institute, nakapahadlok ang padayon nga pagsaka sa kaso sa virus sa mga mammal sa Europe, nga nagpasabot nga nagkalapad na ang epekto niini sa wildlife.
Gipasabot usab niya nga ang virus mikatag na hangtod sa Arctic, nga mahimong makadaot sa delikadong ecosystem ug mga hayop sa maong lugar.
Ang gobernador sa Svalbard miingon nga ang resulta sa brain samples sa polar bear ug walrus kusog nga ebidensya nga bird flu ang posibleng hinungdan sa ilang kamatayon.