Misugyot ang Ukraine sa Russia og temporaryong hunong-pabuto sa Black Sea aron mapanalipdan ang mga sibilyan ug mga barko, human misaka ang mga pag-atake sa mga barko ug pantalan nga gigamit sa pag-export sa mga produktong pang-agrikultura sa Ukraine.
Gipadala sa Kyiv ang maong sugyot pinaagi sa usa ka third party ug naghulat pa sa tubag gikan sa Moscow.
Samtang, nagkabingkil ang Russia ug Ukraine sa pag-atake sa mga barko nga gigamit sa ilang exports.
Tungod sa nagkagrabeng tensyon, pipila ka shipping companies ang naglikay sa pag-agi sa Odesa, usa sa importanteng sentro sa grain exports sa Ukraine.
Samtang, gisuspende usab sa Russia ang operasyon sa tulo ka terminal sa Black Sea port sa Novorossiysk human giingong giatake kini sa Ukraine, nga posibleng makaapekto usab sa grain exports sa Russia.
Matud ni Russian Deputy Foreign Minister Alexander Grushko, wala pa sila makadawat og pormal nga hangyo gikan sa Ukraine alang sa Black Sea ceasefire.