Nakadani og atensiyon sa mga netizens ang klaro ug limpyo tan-awon nga tubig-baha nga milukop sa Chiba Station sa Japan human sa record-breaking nga pag-ulan sa Chiba Prefecture.
Mutud pa susama sa usa ka dako nga swimming pool ang estasyon sa unang pagtan-aw, hinungdan nga usa ka netizen miingon, “I thought it was a night pool,” nga nakadawat og gatosan ka likes sa social media.
Apan luyo sa talagsaong hulagway, seryoso ang kahimtang sa Chiba tungod sa grabeng pagbaha.
Miabot sa tuhod ang tubig sa mga exit ug underground concourse sa Chiba Station, hinungdan nga napugos pagsira ang mga tindahan, samtang miabot usab ang baha sa train platform sa JR Chiba Station.
Daghang sakyanan ang nalubong hangtod sa ilang mga pultahan ug dili na maagian ang ubang mga dalan.
Kapin 200 ka stranded commuters ang nangitag kapasilongan sa prefectural government building human dili na sila makauli.