Gikumpirma ni US President Donald Trump nga nagbilin siya og estrikto nga instruksyon sa militar sa Estados Unidos nga bombahan ang tibuok nasod sa Iran sa “lebel nga wala pa nila masaksihi sukad” kung ugaling magmalampuson ang maong nasod sa pagpatay kaniya pinaagi sa usa ka asasinasyon.
Kini nga pamahayag giluwatan ni Trump sa usa ka interview taliwala sa nagpadayong grabeng tensyon tali sa Washington ug Tehran. Matod pa sa presidente, dugay na siyang nalakip sa listahan sa mga target sa Iran, hinungdan nga nagbilin na siya og tinuyong dekreto sa iyang mga opisyal nga pulburaon ug silsilon ang tibuok nasod kon duna may dautang mahitabo sa iyang kinabuhi.
Kahinumdoman nga nakadawat ang Amerika og intelligence report gikan sa nasod sa Israel kalabot sa giingong plano sa Iran batok sa seguridad ni Trump. Misamot pa ang kakuyaw sa sitwasyon human pormal nga gideklara sa presidente nga hingpit nang natapos ang ceasefire o tigil-putukan tali sa duha ka nasod, human sa sunod-sunod nga pagpamaril ug pag-atake sa Iran sa mga komersyal nga barko nga nagaagi sa Strait of Hormuz.