Gimanduan ni US President Donald Trump ang NBA star nga si LeBron James nga mangayo og pasaylo tungod sa giingong pagpasipala niini sa nasudnong awit sa Estados Unidos.
Matud ni Trump, wala mohunong si James sa iyang gibuhat samtang gipatokar ang nasudnong awit sa US.
Nahitabo ang insidente samtang nagpraktis og golf swing ug mga tira sa basketball ang atleta sa wala pa ang dula batok sa New York Knicks.
Giinsistir ni Trump nga kinahanglan mangayo og pasaylo si LeBron tungod sa giingong pagpasipala niini sa nasud ug sa mga bayani ug sundalong Amerikano.
Dugay nang nagbinayloay og kritisismo ang duha, diin niadtong 2018, gitawag ni Trump nga dili intelihente si LeBron human ipahayag sa basketbolista nga wala kini plano nga molingkod tapad sa presidente.
Sa miaging mga pamahayag, giakusahan usab sa basketbolista si Trump nga racist.
Samtang, niadtong Hulyo, gipili ni Trump si Michael Jordan isip labing maayong basketbolista sa tibuok kalibotan.