Gikaingong mibayad ang pop superstar nga si Taylor Swift og US$160,000 o kapin sa ₱9.3 milyon alang sa permit ug mga kahikayan sa seguridad sa New York City aron sa gituohang kasal nila sa NFL star nga si Travis Kelce sa Madison Square Garden karong bulana.
Sumala sa giingong pahayag ni New York City Mayor Zohran Mamdani niadtong Biyernes, si Swift mismo ang mipas-an sa bayronon alang sa permit ug sa seguridad sa maong kalihokan.
Gihimo ang maong pamahayag human siya gipangutana sa mga tigbalita kon gibayran ba sa mang-aawit ang gasto sa overtime sa mga pulis nga gibutang aron magbantay sa seremonya.
Matud pa sa mayor, ang permit alang sa maong kalihokan, lakip ang mga kinahanglanong lakang sa seguridad, mokabat og kapin sa US$160,000.
Giingong ang selebrasyon gihimo sulod sa duha ka adlaw sa Manhattan ug gitambongan sa daghang iladong personalidad.
Nanginahanglan usab kini og dakong deployment sa kapulisan ug temporaryong pagsira sa pipila ka mga kalsada sa palibot sa Madison Square Garden.
Samtang kabahin niini, wala pa opisyal nga gipahibalo ang kinatibuk-ang gasto sa maong kalihokan.
Base sa banabana sa Forbes, gituohang milapas kini sa US$20 milyon.