Andam na nga mobalik sa pag-arte ang aktres nga si Sunshine Cruz human sa tulo ka tuig nga pagpahuway sa showbiz tungod sa iyang pakigbatok sa sakit nga myasthenia gravis.
Pinaagi sa usa ka post sa social media, gibutyag ni Sunshine nga sulod sa tulo ka tuig, duna’y ubay-ubay nga mga pelikula ug proyekto ang iyang gibalibaran aron mahatagan og prayoridad ang iyang panglawas ug hingpit nga pag-ayo. Sumala kaniya, mapasalamaton siya nga kanunay gihapon siyang gihunahuna alang sa mga papel, apan dili niya gusto nga mamahimong pabug-at sa produksyon kung kalit man ugaling mosumpong o mo-flare up ang iyang autoimmune disease.
Bisan pa man nga anaa pa sa proseso sa pag-ayo, malipayong gipahibalo sa aktres nga nakadawat na siya og medical clearance gikan sa iyang neurologist nga nagtugot kaniya nga modawat og bag-ong acting project. Gipaambit usab ni Sunshine ang iyang kahinam tungod kay gawas nga duha lang ka adlaw ang taping, makatrabaho pa niya ang usa ka aktor nga dugay na niyang gipangandoy nga makauban. Ang kataposang teleserye nga gihimo sa aktres mao ang “Unbreak My Heart” niadtong tuig 2023.