Giimbestigahan karon ang usa ka trabahante sa Office of the Ombudsman tungod sa sayop nga pagproseso sa counter-affidavit nga gisumite ni Senador Robin Padilla sa kaso nga obstruction of justice.
Matud ni Ombudsman Jesus Crispin Remulla, napamatud-an nga nakasumite si Padilla sa iyang counter-affidavit, apan wala kini ma-log sa Central Records ug diretso nga napadala sa investigating division.
Sukwahi kini sa mga nikatap nga mga balita diin gibatikos si Senador Padilla tungod kay wala mipasa sa affidavit may kalambigitan sa reklamo nga gisang-at sa grupong Tindig Pilipinas kalabot sa giingong pagtabang nila Sen. Robin Padilla, Sen. Alan Peter Cayetano ug kanhi Senate Sergeant-at-Arms Mao Aplasca kang Sen. Ronald “Bato” dela Rosa aron makalikay sa arrest warrant nga gi-isyu sa International Criminal Court (ICC).
Kahinumduman nga una nang gibutyag ni Senator Padilla nga girespito niya ang Ombudsman ug nisubay siya sa balaod.