Nagpadayon karong Agosto 29 ang special elections sa Dasmariñas City, Cavite alang sa pagpili sa bag-ong representante sa distrito sa House of Representatives bisan pa sa kusog nga pag-ulan sa lugar.
Gibanabana nga 447,387 ka rehistradong botante ang mobotar sa 43 ka voting centers.
Gisugdan alas-5 sa buntag ang sayong pagboto alang sa mga senior citizen ug persons with disabilities, samtang alas-7 sa buntag gisugdan ang regular voting.
Mipaabot sa iyang kablaka bahin sa mga senior citizen ug persons with disabilities nga nagpadayon sa pagboto bisan kusog ang ulan, ug posibilidad sa pagpalugway sa oras sa voting si Comelec Chairman, George Erwin Garcia.
Gibisita mismo ni Garcia ang Dasmariñas Elementary School aron susihon ang dagan sa voting, ilabina alang sa mga botanteng anaa sa vulnerable sectors.
Gipahinumdoman usab sa Comelec ang mga botante nga dili pugson ang pag-adto sa polling centers samtang kusog ang ulan ug mahimong maghulat hangtod mohinay kini.
Aduna usab kapilian ang Comelec nga palugwayan ang oras sa pagboto kung gikinahanglan.
Mipahimangno usab si Garcia sa mga botante nga unahon ang ilang kaluwasan ug posibilidad sa extension sa voting hours.
Sa pagkakaron, nagpadayon ang regular voting hangtod alas-3 sa hapon.
Wala usab pay nakitang pagbaha sa mga voting center nga nasusi, bisan ubos sa Orange Rainfall Warning ang Cavite.
Gitinguha sa Comelec nga mahuman ang canvassing karong adlawa ug maproklamar ang modaog sa unang bahin sa Agosto 30.