Narekober sa kapulisan ang duha ka hinagiban ug pipila ka pakete sa gituohang shabu atol sa Oplan Bakal Sita sa usa ka internet café sa Purok 2, Barangay 9, Malaybalay City, pasado alas 11:00 sa gabii niadtong Oktubre 21, 2026.
Gipangunahan ni PLTCOL Ariel Philip Pontillas, officer-in-charge sa Malaybalay City Police Station, ang operasyon nga kabahin sa kampanya batok sa kriminalidad ug pagpatuman sa curfew ordinance alang sa mga menor de edad.
Matud sa report, adunay mga batan-on nga midagan dihang namatikdan ang pag-abot sa mga pulis, samtang gibiyaan sa maong lugar ang mga hinagiban ug gituohang ilegal nga droga.
Gipunting ni Pontillas nga hugot nilang ipatuman ang curfew aron mapanalipdan ang mga menor de edad ug malikayan ang ilang pagkalambigit sa ilegal nga mga kalihokan ug kriminalidad.
Gipahinumdoman usab sa kapulisan ang mga ginikanan ug tag-iya sa mga establisemento nga magmatngon ug mosunod sa mga lokal nga ordinansa.