Gipadayag ni Senador Juan Miguel “Migz” Zubiri ang iyang pagbati ug pagsalig sa katawhan sa Bukidnon taliwala sa kontrobersiya may kalabotan sa pagbotar sa mga kongresista sa probinsya sa impeachment complaint batok kang Vice President Sara Duterte.
Matud sa senador, wala’y kongresista sa Bukidnon nga mibotar og “yes,” hinunoa adunay mibotar og “no” ug uban nga ni-abstain.
Dugang usab niini nga wala siya manghilabot o nagdikta sa desisyon sa mga kongresista ug girespeto niya ang ilang tagsa-tagsa ka baruganan.
Sa emosyonal nga pamahayag, gipasiugda ni Zubiri ang iyang dakong gugma alang sa Bukidnon ug sa katawhan niini.
Matud niya, andam siyang mosakripisyo ug bisan mamatay alang sa probinsya ug sa katawhan sa Bukidnon, ilabi na alang sa mga lumad, kabos, ug landless sectors.
Giangkon usab niini nga nasakitan siya sa mga pagbatikos apan nakasabot gihapon siya sa lain-laing opinyon sa politika.
Dugang pa ni Zubiri nga sa umaabot nga impeachment trial ni Bise Presidente Duterte, mopabilin siyang patas, makiangayon, ug magbase lamang sa ebidensya.
Gisaad usab niini sa katawhan sa Bukidnon nga dili siya mopabor sa politika ug iyang tumanon ang iyang katungdanan isip senador nga adunay hustisya ug transparency.