Nangayo og pasaylo si Senador Juan Miguel “Migz” Zubiri sa mga taga-Bukidnon nga nasuko kaniya human wala kini niuban sa majority group sa Senado kini dungan sa iyang pagpagawas sa iyang gibating kasakit batok sa giingong pagtraydor sa pipila niya ka kaalyado sa politika. Atol sa iyang gipahigayon nga press conference ning siyudad sa Malaybalay, gipahayag ni Zubiri nga kaya niyang makigtrabaho bisan sa mga dili niya kapartido basta adunay respeto ug pagtinabangay, apan lahi na matud pa kon pagluib ug traydoran ang gihisgutan.
Gibutyag sa senador nga dako ang iyang kahiubos human natangtang isip Senate President tungod sa kalit nga pagbawi sa suporta sa pipila ka mga senador nga una niyang kasangga, lakip sila si Senador Ronald “Bato” Dela Rosa, Senador Bong Go, Senadora Imee Marcos ug Senador Robin Padilla. Matud pa ni Zubiri, kon wala siya gitalikdan sa maong mga senador, dili unta siya matangtang sa liderato niadtong tuig dos mil bente kwatro (2024), diin iyang gipakita nga adunay dako nga koneksyon ang pagkawala sa suporta kaniya sa pagpadayon niya sa mga hearing kabahin sa gitawag nga PDEA leaks nga gipangulohan mismo ni Dela Rosa.
Dugang pa niini, gipatin-aw sa senador nga wala siya’y problema sa mga kontra sa politika, apan lisod na alang kaniya ang pagsalig pag-usab sa mga tawo nga mibiya kaniya sa tsansa sa politikal nga pagsulay. Bisan pa man niini, gipadayag ni Zubiri nga magpadayon siya sa pagserbisyo sa katawhan sa Bukidnon ug sa tibuok Mindanao samtang nagpabilin iyang baroganan ang dignidad, prinsipyo, ug integridad sulod sa Senado.