Gikwestiyon ni Sen. Imee Marcos atol sa miting sa Bicameral Conference Committee (bicam) ang kakulang proposed budget sa Department of Public Works and Highways (DPWH) sa kasamtangang deliberasyon sa P6.793 trilyon nga 2026 national budget.
Sumala ni Marcos, wala siya’y nakita nga budget sa DPWH sa bisan unsang dokumento, lakip na sa 9-page summary sa reconciliation of disagreeing provisions nga gihatag sa mga magbabalaod.
Gipasabot ni Senate Committee on Finance Chairman Sherwin Gatchalian nga planong hisgutan ang DPWH budget sa mosunod nga adlaw, kauban ang special purpose funds ug unprogrammed appropriations.
Apan gipunting ni Marcos nga apil na niini ang unprogrammed appropriations sa mga dokumento ug katingad-an nga wala nahilakip ang DPWH, ilabi na nga molapas sa 1,500 pages ang committee report.
Ang DPWH usa sa pinakadakong ahensya nga matag tuig nga makadawat og dako nga pondo, kasagaran tali sa P800 bilyon hangtod P900 bilyon, para sa mga proyekto sa imprastruktura sama sa mga dalan, tulay, flood control ug uban pang public works.
Sa 2026 budget, gilauman nga apil ang DPWH sa mga ahensya nga adunay pinakadakong alokasyon, sunod sa Department of Education ug Department of Health.
Tungod niini, gibug-aton ni Marcos nga dili angay mawala sa mga dokumento ang DPWH budget tungod kay usa kini sa labing hinungdanong bahin sa nasudnong pondo.
Gihangyo usab sa senadora nga ihatag ang kompletong mga dokumento aron matun-an kini sa mga miyembro sa bicam, ug malikayan ang kabalaka sa publiko nga basin adunay gitago sa proseso sa budget reconciliation.