Gipasalig karon sa Department of Trade and Industry o DTI-Bukidnon nga nagpabiling stable ug lig-on ang presyo sa dakong bahin sa mga gamit sa eskwela sa probinsya dungan sa pag-abli sa klase karong bulana.
Gibutyag ni Consumer Protection Division Head Junar Merla nga sa 154 ka mga school supply items nga ilang ginasubay, 70 porsyento niini ang walay bisan unsang kausaban sa presyo. Samtang 13 porsyento lang ang nakatala og pagsaka, ug 17 porsyento naman ang mibarato depende sa brand ug kalidad sa maong mga produkto.
Aron mas makadaginot ang mga komunidad, giluspad usab sa DTI ang ilang “Diskwento Caravan: Balik Eskwela Edition” isip suporta sa Brigada Eskwela. Giawhag karon sa maong buhatan ang mga ginikanan nga sutaon ang updated nga price guide sa ilang opisyal nga Facebook page aron masiguro nga husto ug makatarunganon ang presyo sa ilang mapalit nga mga kagamitan.