Gisaway ni Cuban President Miguel Díaz-Canel ang Estados Unidos diin iyang giakusahan ang administrasyong U.S. nga nagtinguha nga “angkonon” ang Cuba pinaagi sa padayong pagpanggipit ug mga sanksyon.
Sa iyang diskurso atol sa saulog sa National Rebellion Day sa Pinar del Río, gihulagway ni Díaz-Canel nga usa ka “armas sa gubat” ug genocidal policy ang embargo ug oil blockade sa U.S. aron pig-oton ang ekonomiya ug pahirapan ang katawhan sa isla.
Gipahayag sa pangulo nga naglaum ang Washington nga ang maong pagpanggipit makapukaw og pag-alsa sa mga lungsuranon batok sa kasamtangang gobyerno aron mapahimutang ang usab nga rehimen nga modawat sa ilang interes.
Tungod sa maong mga sanksyon, nag-atubang karon ang Cuba sa grabe nga krisis sa kuryente, fuel, ug ekonomiya. Bisan pa man niini, nanawagan si Díaz-Canel sa panaghiusa sa iyang katawhan aron depensahan ang ilang soberanya ug kagawasan.