KALILANGAN, BUKIDNON — Napalgan ang nadunot nang patay’ng lawas sa usa ka lalaki sulod sa iyang balay sa Purok 5, West Poblacion, Kalilangan, Bukidnon niadtong Hulyo 21.
Subay sa report sa Kalilangan Municipal Police Station, nagpatabang sa pulisya ang mga kasilinganan human sila makamatikod og kusog nga alisbo o baha-o gikan sa balay sa biktima, nga katapusang nakitang buhi niadtong Hulyo 17.
Tungod kay nakatrangka man ang pangunang pultahan gikan sa sulod, gipugos kini pag-abli sa mga otoridad uban sa tabang sa mga opisyal sa barangay ug pagtugot sa pamilya sa biktima. Didto napalgan ang wala na’y kinabuhi nga lalaki nga nagda-as sa iyang higdaanan.
Base sa gipahigayong post-mortem examination sa Municipal Health Officer, gibanabanang sobra na sa 48 ka oras nga nakabsan sa kinabuhi ang biktima diin dako ang posibilidad nga gi-atake kini sa stroke subay na usab sa iyang karaang balatian.