Gipaluyohan sa usa ka ekonomista ang giduso nga balaodnon sa Kamara nga magpaubos sa Value Added Tax (VAT) o buhis sa mga palitonon gikan sa 12% ngadto sa 10% aron matabangan ang katawhan taliwala sa nagpadayong krisis sa lana.
Sumala ni Ray Talimio Jr., kanhi miyembro sa Economic Development Committee sa RDC-X, dako og ikatabang ang maong “VAT Reduction Act” aron mapugngan ang paspas nga pagsaka sa inflation ug aron mahimong mas kompetitibo ang nasod sa Southeast Asia. Aron dili makuhaan ang pundo sa gobyerno tungod sa maong bawas-buhis, gisugyot niini ang hingpit nga digitalization sa Bureau of Customs ug BIR, uban ang mas estrikto nga kampanya batok sa talamak nga smuggling ug tax evasion.
Bisan pa man niini, giangkon ni Talimio nga makasinati og malisod nga dalan ang maong sugyot-balaodnon ni Rep. Leandro Leviste. Matud niya, isip usa ka batan-on ug idealistikong mambabalaod, posibleng maglisod si Leviste sa pagkuha og igong suporta sa Kongreso nga giisip sa kadaghanan isip usa ka “old boys club” diin kinahanglan gyud nga makig-angay sa naandan nga dula sa pulitika aron makapasar og balaod.