MALAYBALAY CITY, BUKIDNON — Nagpagawas og pasidaan ang PAGASA Malaybalay ngadto sa mga residente ug mag-uuma sa Bukidnon nga mangandam sa epekto sa very strong El Niño nga gilaumang mas mabati sa lalawigan sugod karong Nobyembre hangtod sa unang bahin sa 2027.
Basi sa pahayag ni PAGASA Malaybalay Chief Meteorological Officer Ybonne Mae Gabales Pedreza, gilauman nga mokunhod ngadto sa 40 hangtod 80 porsyento ang pag-ulan sa Bukidnon gikan Nobyembre hangtod Pebrero 2027 tungod sa padayong pag-init sa sea surface temperature sa Tropical Pacific.
Gipasidaan usab nga posibleng mosaka sa kapin 40 degrees Celsius ang heat index sa pipila ka dapit kon magpadayon ang grabeng kainit—diin sa kasamtangan, miabot na sa 36 hangtod 38 degrees Celsius ang kainiton nga natala sa lungsod sa Maramag.
Tungod niini, giawhag sa PAGASA ang mga lokal nga panggamhanan ug mga mag-uuma nga magmatngon sa pagpili og pananom nga dili kaayo nanginahanglan og tubig, ug kanunay nga mosubay sa mga advisory sa Department of Agriculture ug DRRM offices aron mamenosan ang epekto sa hulaw.