Gitambagan ni 1-Sambayan convenor Atty. Howard Calleja si Senador Robinhood Padilla nga tun-an pag-ayo ang balaod ug may kalabotang mga kaso isip pagrespeto sa iyang katungdanan isip magbabalaod.
Gihimo ni Calleja ang maong pamahayag human sa hangyo ni Senador Padilla ngadto sa Senate Impeachment Court nga tugotan sila Senador Rodante Marcoleta ug Senador Jinggoy Estrada nga makatan-aw sa nagpadayong impeachment trial.
Sa pagkakaron, nag-atubang og kasong plunder ang duha ka senador.
Si Estrada anaa sa kustodiya sa New Quezon City Jail, samtang si Marcoleta anaa sa Philippine National Police (PNP) General Hospital.
Matud ni Calleja, ang usa ka senador kinahanglan unang mosabot sa mga probisyon sa balaod ug sa kasamtangang mga lagda sa dili pa mosugyot og mga posisyon o maghatag og mga rekomendasyon.
Dugang pa niini, nga sayon lamang ang pagrekomenda, apan kinahanglan usab nga hinumdoman ni Padilla nga ang duha ka senador kasamtangang suspendido tungod sa mga kasong ilang giatubang.
Matud usab ni Calleja nga dili angay tugotan ang mga suspendidong senador nga moapil o mobantay sa impeachment proceedings, ni maghatag og obserbasyon sa nagpadayong pagdungog.
Gipahinumdoman usab niya nga kaniadto wala usab gitugotan ang mga suspendidong senador sama nila Leila de Lima, Antonio Trillanes, Jinggoy Estrada, Juan Ponce Enrile, ug uban pa nga moapil sa mga proceedings, busa wala’y rason nga usbon ang mga lagda aron lamang ma-accommodate sila Estrada ug Marcoleta.
Gibarugan ni Calleja nga walay angay hatagang exemption, bisan kinsa pa ang naglingkod o suspendidong senador.