Nagpahayag og kabalaka si Leonardo Montemayor, kanhi kalihim sa Department of Agriculture ug chairman sa Federation of Free Farmers, sa mahimong epekto sa ipatuman nga P50 kada kilo nga price ceiling sa bugas ngadto sa sektor sa agrikultura ug sa mga mag-uuma sa nasud.
Sa pakighinabi sa Bombo Radyo, sigon ni Montemayor nga bisan pro-consumer ang maong polisiya sa gobyerno, wala pa masayri kon unsa ang mahimong long-term nga epekto niini sa mga mag-uuma og bugas.
Matod ni Montemayor, adunay posibilidad nga mokunhod ang presyo sa bugas tungod sa pressure nga mabati sa mga rice trader ug retailer nga mapugos sa pagbaligya sa bugas sa mas ubos nga presyo.
Gipasabot usab ni Montemayor nga daghang retailer ang nagreklamo nga mahal na daan ang imported rice nga ilang mapalit gikan sa mga supplier, busa posible silang malugi kon ibaligya kini sa P50 kada kilo o mas ubos pa.
Dugang pa niini, dili lamang mga retailer ang mahimong maapektuhan sa price ceiling kondili lakip usab ang mga mag-uuma nga posible makasinati og pagkunhod sa farmgate price sa humay.