Nagtagana ang gobyerno og P1 bilyon sa University of the Philippines o UP System alang sa pagpalig-on sa Project NOAH, aron makatabang sa mas sayong pag-ila sa peligro sa baha ug uban pang kalamidad.
Sumala ni Presidential Communications Office Undersecretary ug Palace Press Officer Claire Castro, gimandoan ni Pangulong Ferdinand Marcos Jr. ang Department of Budget and Management kon DBM nga ipagawas ang pondo alang sa pagpalig-on sa proyekto gamit ang artificial intelligence o AI, real-time hazard monitoring ug flood forecasting.
Sa kinatibuk-ang pondo, P935 milyon ang igahin alang sa research services, samtang P65 milyon alang sa project management ug administration.
Gamiton usab ang pondo alang sa mga gikinahanglang kagamitan, teknolohiya ug mga eksperto.