Miabot na sa P1.79 bilyon ang kadaot sa sektor sa agrikultura tungod sa hiniusang epekto sa habagat ug sa mga bagyong Luis, Maymay ug Neneng.
Sumala sa Department of Agriculture kon DA, mokabat sa 51,229 ka mag-uuma ang naapektuhan sa maong mga kalamidad.
Base usab sa datos sa Disaster Risk Reduction and Management Operations Center o DRRM-OpCen sa DA, kapin 41,647 ka ektarya sa agricultural lands ang naapektuhan.
Narekord usab ang pagkawala o pagkadaot sa 44,745 metriko tonelada sa mga produkto tungod sa dili maayong kahimtang sa panahon.
Lakip sa mga lugar nga naapektuhan ang Ilocos Region, Cordillera Administrative Region, Cagayan Valley, Central Luzon, CALABARZON, MIMAROPA, Bicol Region ug Western Visayas.
Gipaabot nga posibleng mosaka pa ang kantidad sa kadaot, tungod kay padayon pa ang assessment sa Department of Agriculture sa mga lugar nga naapektuhan.