Ordinaryong Pilipino, gikabalak-ang mas grabe nga maapektuhan sa panagbangi sa Pilipinas ug China.

Gipasiugda ang kamahinungdanon sa diplomasya ug malinawon nga pakigpulong sa pagdumala sa panagbangi sa Pilipinas ug China, ilabina aron malikayan nga ang ordinaryong mga Pilipino maoy mag-antos sa epekto sa nagkagrabeng tensiyon tali sa duha ka nasod.

Matud pa sa usa ka kanhing diplomat, lakip sa posibleng maipit sa panagbangi ang mga mangingisda, mga sakop sa Philippine Coast Guard ug Navy, ug mga overseas Filipino worker.

Gibug-atan usab niya nga angay unahon sa Pilipinas ang kaugalingong interes sa pag-atubang sa mga isyu sa China ug Estados Unidos, imbes nga magpabilin sa kampo sa bisan hain niini.