Usa ka Overseas Filipino Worker (OFW) ang namatay sa Dammam, Saudi Arabia, human maigo sa mga tipak sa drone nga gihulog sa air defense sa usa ka oil field facility.
Kini gikumpirma sa Department of Migrant Workers (DMW) niadtong Huwebes, Oktubre 22, diin duha ka residente ang namatay, lakip ang usa ka Pilipino ug usa ka Nepali, samtang duha ka nasyonal sa Pakistan ug India ang nasamdan.
Padayon ang DMW sa pagpakigtambayayong sa mga otoridad sa Saudi Arabia ug Pilipinas aron masuta kon adunay uban pang OFW nga naapektuhan sa insidente.
Matud ni DMW Secretary Hans Leo J. Cacdac, hugot nilang gibantayan ang sitwasyon ug naghulat sa dugang nga mga taho gikan sa ilang mga kauban sa lugar.
Giawhag usab ang mga Pilipino sa Saudi Arabia ug sa ubang bahin sa Middle East nga magpabiling alerto ug mosunod sa mga pahimangno sa lokal nga mga otoridad.
Gipahimangnoan ang mga OFW nga likayan ang mga lugar nga posibleng maapektuhan sa mga pag-atake, sama sa mga pagtukodsa militar ug pasilidad sa lana.