Gikabalak-an sa National Grid Corporation of the Philippines (NGCP) ang posibilidad sa mas kanunay nga pagkaputol sa linya sa kuryente sa Mindanao tungod sa kakulang sa suplay sa enerhiya ug pagpangawat sa mga piyesa sa transmission towers sa Bukidnon ug kasikbit mga lugar.
Sa pakighinabi sa Bombo Radyo Malaybalay, gipadayag ni NGCP spokesperson Mae Roselle Curiano nga giisa sa Red Alert ang kahimtang sa sugang dagitabnon kagahapong adlawa, gikan alas-12 sa udto hangtod alas-9 sa gabii.
Dugang pa niini, dili igo ang suplay gikan sa mga power plant aron matubag ang panginahanglan sa grid, hinungdan nga napugos ang NGCP sa manual load dropping o rotational brownout.
Gawas niini, gikabalak-an usab sa NGCP ang pagpangawat sa iron angles ug uban pang piyesa sa transmission towers sa Bukidnon.
Gipasidaan ni Curiano nga kung matumba ang tore tungod sa pagkahuyang niini panahon sa kusog nga hangin o linog, mahimong magdugay ang pag-ayo ug mahimong moresulta sa lapad nga blackout sa Bukidnon ug ubang bahin sa Southern Mindanao.