Nakab-ot sa usa ka Brazilian couple ang titulo sa Guinness World Records human makahimo og 195 ka halok sulod lamang sa 30 segundos.
Si Renato Bayma Gaia, 32 anyos, ug ang iyang uyab nga si Naiara Roberta Ribeiro de Marins, 33 anyos, maoy nakarekord sa maong kalampusan nga naghatag kanila sa titulo nga “Most Kisses in 30 Seconds by a Pair.”
Matud ni Gaia, ang maong rekord usa ka pamatuod nga sila ni de Marins ang “pinakamaayong magtiayon sa kalibotan.” Dili kini ang unang Guinness World Record ni Gaia.
Una na siyang nakakuha og rekord alang sa pinakapaspas nga paghan-ay ug pagpatumba sa 10 ka libro sulod sa 6.68 segundos, ingon man sa pinakadakong pagliko sa tiil sa usa ka lalaki nga niabot sa 210.66 degrees.
Samtang, nagplano usab ang magtiayon nga buakon ang rekord sa pinakadaghang halok sulod sa usa ka minuto, nga sa pagkakaron gihuptan sa Japanese couple nga sila Cherry Yoshitake ug Kumiko Shiratori, nga adunay 277 kisses sulod sa 60 segundos.