Nakatala og duha ka bag-ong Guinness World Records ang usa ka Australianong imbentor uban sa tabang sa mga siklista sa Britanya pinaagi sa paghimo sa pinakadako ug pinakagamay nga masakyan nga penny farthing nga bisikleta sa kalibotan.
Gidala ni Dan Bolwell ang iyang talagsaong mga imbensyon ngadto sa City of London Nocturne cycling event nga gipahigayon niadtong Hunyo 13.
Lakip niini ang higanteng bisikleta nga gitawag og “Big Bertha,” nga adunay kahabogon nga 9 feet ug 3 ka pulgada.
Si Neil Laughton, lider sa Penny Farthing Club, mao ang misakay sa Big Bertha ug malampusong nakabisikleta og 330 feet.
Tungod sa kadako sa bisikleta, napugos pa siyang magsul-ob og stilts aron maabot ang mga pedal.
Pinaagi sa maong kalampusan, si Laughton ug Bolwell nahimong maghi-usa nga naghupot sa Guinness World Record alang sa pinakadakong masakyan nga penny farthing sa kalibotan.
Wala didto matapos ang kalampusan ni Bolwell.
Nakuha usab niya ang ikaduhang Guinness World Record pinaagi sa iyang gihimong pinakagamay nga penny farthing nga bisikleta.
Ang maong bisikleta nga ginganlang “Little Bee” adunay kahabogon nga 2 feet ug gisakyan sa managsoon nga sila Flo Woodward, 7 anyos, ug Finn Woodward, 6 anyos.
Tungod niini, ang Little Bee opisyal nga giila isip pinakagamay nga masakyan nga penny farthing nga bisikleta sa tibuok kalibotan.