Narekober sa kapulisan ang duha ka hinagiban ug pipila ka pakete sa gituohang shabu atol sa Oplan Bakal Sita sa usa ka internet café sa Purok 2, Barangay 9, Malaybalay City, pasado alas 11:00 sa gabii niadtong milabay’ng adlaw.
Tungod niini, gipahugtan sa kapulisan ang pagpatuman sa curfew sa mga menor de edad human masapwan ang pipila ka kabatan-onan nga nagdula sa computer shop sa maong lugar hangtod sa lawom nga kagabhion, diin nadiskubre usab ang gituohang ilegal nga droga.
Matud ni Police Colonel Ariel Philip Pontillas, officer-in-charge sa Malaybalay City Police Station, gisugdan ang aksyon subay sa mga reklamo nga gipadayag sa mga konsehal sa dakbayan kalabot sa padayong paglapas sa curfew sa mga kabatan-onan.
Nakapabalaka sa kapulisan nga ang ubang nasapwan sa maong lugar pito ngadto sa walo lamang ka tuig ang edad, samtang gikabalak-an usab ang posibleng peligro sa ilang kaluwasan tungod sa presensya sa gituohang ilegal nga droga.
Giawhag sa kapulisan ang kooperasyon sa City Social Welfare and Development Office, lokal nga panggamhanan ug komunidad aron masulbad ang maong problema.
Nanawagan usab sila sa mga ginikanan nga hugtan ang pagbantay sa ilang mga anak aron malikayan ang pagkalambigit niini sa ilegal nga droga ug uban pang kalapasan sa balaod.