Gipadayag sa mga mag-uuma ang ilang kabalaka human gikuwestiyon ang ilang pagpanag-iya sa yutang nadawat ubos sa Comprehensive Agrarian Reform Program o CARP, bisan pa og nakompleto na ang proseso ug naisyuhan na sila og Certificate of Land Ownership Award o CLOA.
Matud ni Gemma Dela Cruz Herera, President Upper Puerto CARP Beneficiaries Association, una nang gilakip sa Department of Agrarian Reform o DAR ang maong yuta sa programa ug gipahigayon ang pagsurbi ug pagproseso sa mga dokumento. Apan misugod ang panaglalis dihang adunay broker nga giingong namaligya sa yuta ngadto sa ubang interesadong partido.
Gibutyag usab niini nga human sa dugay nga paghulat ug pagbalik-balik sa opisina sa DAR, nakadawat na sila og CLOA ug nakabayad usab sa buhis sulod sa pipila ka tuig.
Apan mibalik ang ilang problema dihang adunay laing mga tawo nga giingong nag-angkon sa maong yuta ug adunay mga titulo nga nalambigit sa panaglalis.
Dugang pa, nasayran nila nga adunay gihimong lakang sa Central DAR nga may kalabotan sa pag-exempt sa yuta sa programa, nga ilang gikuwestiyon tungod kay nahuman na ang proseso sa ilang mga dokumento. Nangayo sila og katin-awan kon nganong gitugotan pa ang maong lakang bisan adunay mga benepisyaryo nga nakadawat na og CLOA.
Gihangyo sa mga mag-uuma ang DAR ug ang ubang hingtungdang ahensiya nga susihon pag-usab ang mga dokumento ug aksiyon nga may kalabotan sa yuta, ug klarohon ang legal nga katungod sa mga benepisyaryo.
Matud nila, ang ilang tumong mao ang mapanalipdan ang yuta nga ilang dugay nang gipanguma ug gisaligan alang sa ilang panginabuhi.