Dili mahimong itandi ang paggamit sa aliases sa mga bayani kaniadto ngadto sa mga alyas nga nakalista sa mga resibo sa confidential funds sa Office of the Vice President o OVP.
Matud ni Palace Press Officer Usec. Claire Castro, gigamit sa mga bayani ang ilang mga aliases aron matago ang ilang pagkatawo samtang ilang gipanalipdan ang nasud.
Apan lahi, matud pa ang paggamit og alyas kung kini may kalabotan sa pagdawat og bayad.
Gikuwestyon usab ni Castro kung tinuod ba nga mga tawo o posibleng “ghost beneficiaries” ang pipila sa mga ngalan nga makita sa mga resibo.
Samtang, dili manghilabot ang administrasyon sa pamahayag ni Senator Robin Padilla bahin sa iyang pagtandi sa mga bayani ug sa isyu sa confidential funds.
Matud ni Castro, katungod ni Padilla ang pagpadayag sa iyang opinyon, apan importante nga maipasabot sa publiko, ilabina sa mga kabatan-onan, ang tinuod nga papel sa mga bayani.