Gipakusog sa Malaybalay City Police Station ang operasyon batok sa mga menor de edad nga molapas sa curfew human madiskobrehan ang ilegal nga droga sa Barangay 9, Purok 2 ug Purok 5 sa Malaybalay City.
Matud sa hepe sa kapolisan, gihimo ang pagpakusog sa operasyon human ipadayag sa mga opisyal sa lokal nga panggamhanan ang ilang kabalaka sa nagkadaghang menor de edad nga naglapas sa curfew sa siyudad.
Matud sa opisyal, nakapukaw sa ilang kabalaka ang presensya sa mga menor de edad nga magdugay sa mga computer shop, lakip ang pagkadiskobre sa ilegal nga droga nga gibiyaan sa salog sa maong mga lugar.
Gipatin-aw usab niya nga nakigtambayayong ang kapolisan sa City Social Welfare and Development Office (CSWD) alang sa pag-rescue sa mga menor de edad nga makaplagang naglapas sa curfew.
Giawhag usab sa hepe ang mga ginikanan nga mas hugot nga bantayan ang ilang mga anak ug dili maghulat nga ang kapolisan o CSWD pa ang mangilabot sa ilang kahimtang.