Nisukol ang nagpailang kanhing “bagman” ni Sara Duterte nga si Ramil Madriaga sa hagit nga sumbagay ni Davao City Mayor Sebastian ”Baste” Duterte.
Sa sulat nga gipadala pinaagi sa iyang abogado nga si Atty. Raymund Palad, gipadayag ni Madriaga ang iyang tubag sa hagit ni Baste.
Matud ni Madriaga, ikapasigarbo niya ang pagdawat sa hagit gikan sa anak sa kanhing presidente.
Apan, gipasabot usab ni Madriaga ang iyang kahimtang karon nga anaa sa prisohan, limitado ang lihok, ug 58 anyos na kini, busa gisugyot niini nga mas maayo nga hagiton sa mayor ang usa ka tawo nga kaedad ug parehas og kusog niini.
Bisan pa niini, andam gihapon si Madriaga nga makigsumbagay ubos sa pipila ka kondisyon, lakip na ang una nga pagsulbad sa iyang mga giatubang nga kaso.
Isip alternatibo, gisugyot niini nga mahimo ang ilang pakigbangi didto sa Annex 2 sa Camp Bagong Diwa, diin anaa siya karon, ug andam siya nga atubangon ang mayor.
Kahinumduman nga nagsugod ang isyu human gihagit ni Mayor Baste si Madriaga og “no holds barred” nga sumbagay, kasunod sa paghisgot sa iyang ngalan sa supplemental affidavit nga gisumite sa House Committee on Justice kalabot sa impeachment proceedings batok kang Vice President Sara Duterte.