Nakakuha og atensiyon sa kadalanan sa Yantai ang usa ka 19-anyos nga street food vendor nga gitawag karon og “Stir Fry CEO” tungod sa iyang talagsaong estilo sa pagbaligya samtang nagsul-ob og elegante ug mahalong business suit.
Si Xiao Lu nagsugod pagtabang sa street food stall sa iyang ginikanan sa edad nga 17 anyos.
Samtang ang iyang amahan maoy nagaandam sa mga panakot, siya usab ang nagaluto gamit ang wok o dakong kal-ha.
Aron mahimong lahi ang ilang puwesto gikan sa daghang parehas nga stalls sa night market, nakahunahuna si Lu nga magsul-ob og semi-formal attire samtang nagluto.
Tungod sa positibong reaksyon sa mga tawo, padayon na siyang nagsul-ob og kompleto nga suit ug amerikana matag gabii sa pagtrabaho.
Matag gabii gikan alas-5 sa hapon hangtod alas-11:30 sa gabii ang iyang trabaho, ug tungod sa iyang pormal nga porma ug swabeng lihok, daghan ang nagtandi kaniya kang Sanji, ang bantogang chef sa One Piece.
Misamot pa ang iyang kasikat human siya nagsugod og live stream sa Douyin, nga maoy hinungdan sa pagdagsa sa mga turista gikan sa nagkadaiyang bahin sa China aron motilaw sa ilang pagkaon.
Bisan pa sa iyang viral nga imahe, sigon ni Lu nga ang talagsaon niyang sinina maoy unang makadani sa mga tawo, apan ang lami sa ilang pagkaon maoy hinungdan nga mobalik-balik ang mga kostumer.
Sa pagkakaron, halos walay undang ang iyang pagluto og kapin 200 ka order matag gabii, diin makahimo siya og usa ka putahe matag tulo ka minuto pinaagi sa paggamit og daghang kalha sa usa ka higayon aron matubag ang dagsang mamalitay.