Human sa kapin tulo ka dekada nga pagkabulag, nakabalik sa iyang tinuod nga pamilya ang usa ka lalaki sa China nga gi-kidnap sa dihang upat ka tuig pa lamang kini.
Si Li Jingwei nakahinumdom lamang sa pipila ka detalye sa iyang lugar sa pagkabata, sama sa usa ka kawayanan, gamayng linaw, ug usa ka eskwelahan.
Tungod niini, iyang gidrowing ang mapa sa baryo sumala sa iyang mga panumduman ug gi-post kini sa social media aron mangayo og tabang.
Dako ang nahimong tubag sa publiko sa iyang istorya ug mitabang ang mga otoridad, netizens, ug teknolohiya aron matultolan ang posibleng lugar nga iyang gigikanan. Sa imbestigasyon, nadiskubre nga biktima diay kini sa child trafficking niadtong 1989.
Pinaagi sa DNA test, napamatud-an nga ang babaye nga iyang nakit-an mao ang iyang inahan.
Emosyonal ang ilang panagkita pag-usab pinaagi sa video call ug sa personal nga paghinagbo human sa 33 ka tuig nga pagkabulag.
Bisan mitaliwan na ang iyang amahan, nagpasalamat si Li sa tanang nitabang sa pagpangita kaniya ug miingon nga wala siyay kasuko sa pamilyang nagpadako kaniya tungod kay maayo ang ilang pag-atiman bisan wala sila masayod nga siya usa ka biktima sa kidnapping.