Gibasura sa Korte Suprema ang petisyon batok kang Senador Francis Escudero nga nangayo nga ipawala ang bisa ang desisyon sa Political Finance and Affairs Department (PFAD) sa Commission on Elections (COMELEC) kalabot sa campaign donation nga iyang nadawat atol sa 2022 elections.
Sumala sa resolusyon sa Korte Suprema nga gipetsahan og Hunyo 3, 2026, gibasura ang petisyon nga gisang-at ni pribadong indibidwal John Barry Tayam tungod kay sayop ang legal nga remedyo nga iyang gigamit.
Nagsugod ang kaso human sa desisyon sa PFAD nga hunongon ang imbestigasyon batok kang Escudero ug kang Lawrene Lubiano, presidente sa Centerways Construction and Development Incorporated, tungod sa kakulang sa ebidensya sa giingong paglapas sa Section 95 sa Omnibus Election Code.
Una nang giangkon ni Escudero nga nakadawat siya og P30 milyon nga campaign donation gikan kang Lubiano, apan gipatin-aw niyang wala siyay kalambigitan sa pagkuha sa kompanya og mga flood control projects sa gobyerno.
Matud sa PFAD, lahi ang legal nga personalidad ni Lubiano ug sa Centerways Construction and Development Incorporated, ug wala’y ebidensya nga ang donasyon naggikan sa pondo sa kompanya.
Sa laing bahin, sumala ni Tayam nga dili angay bulagon ang legal nga personalidad ni Lubiano ug sa Centerways.
Dugang pa niini, dili mahimong isipon nga personal lamang ang donasyon tungod kay dugay nang government contractor si Lubiano, ug ang maong isyu angay untang klarohon sa Korte Suprema.