Pormal nang gipasakahan og kasong obstruction of justice sa PNP-CIDG si Senador Robin Padilla ug pipila ka kaubanan tungod sa giingong pagtabang sa pagpaikyas kang Senador Ronald “Bato” Dela Rosa gikan sa kustodiya sa Senado.
Gikumpirma ni Prosecutor General Richard Fadullon nga opisyal nang nadawat sa Department of Justice (DOJ) ang reklamo ubos sa Presidential Decree No. 1829.
Matod ni CIDG chief, Police Major General Robert Morico II, migawas sa ilang lawom nga imbestigasyon nga usa ka planado ug koordinado nga operasyon ang nahitabo niadtong kaadlawon sa Mayo 14. Gawas sa pagpasakay sa sakyanan ni Padilla, duna pa’y mga backup vehicle nga nagsilbing security escort aron malikayan ang pag-track sa mga awtoridad kang Dela Rosa.
Kahinumduman nga si Dela Rosa nag-atubang og warrant of arrest tungod sa kasong crimes against humanity nga may kalabutan sa “war on drugs” ug gikonsidera na karon sa gobyerno nga usa ka fugitive from justice o pugante.
Sa iyang bahin, nidepensa si Padilla pinaagi sa social media ug gipasabot nga igo lang misabay kaniya si Dela Rosa niadtong gabhiona tungod kay wala kini sakyanan, ug iya kining gibiyaan sa Makati nga wala na mangutana kon asa pa kini moadto. Bisan pa man niini, nagpabilin ang kamanduan ni Justice Secretary Fredderick Vida ngadto sa mga awtoridad nga pangitaon ug arestuhon si Dela Rosa.