Kapin sa P4-K nga kantidad sa smuggled nga sigarilyo, nakumpiska sa Talakag PNP

Nakumpiska sa mga otoridad ang gituohang ilegal nga mga sigarilyo atol sa operasyon nga gihimo sa PNP-Talakag pasado alas-1:00 sa hapon niadtong Sabado, Hunyo 27, sa Barangay 4, Talakag, Bukidnon.

Base sa report sa kapulisan, nakadawat sila og impormasyon gikan sa usa ka concerned citizen kabahin sa giingong ilegal nga kalihukan.

Sa ilang pagresponde, nasakpan ang usa ka 40-anyos nga lalaki nga giingong nagkupot sa maong mga kontrabando. Narekober gikan sa posesyon niini ang tulo ka ream sa San Milano ug usa ka ream sa Delta nga brand sa sigarilyo.

Gibanabanaang mukabat og kapin P4,000 ang kantidad sa mga nakumpiskang kontrabando nga giturn-over ngadto sa Municipal Health Office (MHO) alang sa tukmang disposisyon.