Narekober sa kapulisan sa Northern Mindanao ang gibana-banaang mukabat sa Php 30,000,000 nga kinatibuk-ang balor sa mga smuggled nga sigarilyo human sa sunod-sunod nga malampusong operasyon sa nagkadaiyang Regional Border Control Points ug checkpoints sa rehiyon.
Kini ang gibutyag ni Pmaj. Joann Navarro, ang tigmapamaba sa Police Regional Office 10 atol sa pakighinabi sa Bombo Radyo Malaybalay.
Matud sa opisyal adunay nakumpiska nga kontrabando nga anaa sa Php 7.2 milyones sa Kolambugan, Lanao del Norte, ang gilubong sa mga kopras sulod sa usa ka truck.
Dugang pa opisayal, lakip sa labing dako nga nasakmit mao ang Php 20.8 milyones nga kargamento sa Magsaysay, Misamis Oriental.
Ang maong serye sa mga operasyon miresulta sa pagkaaresto sa pipila ka mga suspek nga kasagarang naggikan sa Zamboanga ug padulong unta sa nagkadaiyang bahin sa rehiyon aron i-deliver ang maong mga ilegal nga produkto.