Mukabat sa kantidad nga Php10,462.00 sa gituohang shabu ang nakumpiska sa tulo ka managlahing operasyon nga gipahigayon sa kapulisan sa probinsya sa Bukidnon niadtong Hunyo 6 ug 7, ning kasamtangang tuig.
Ang maong operasyon miresulta sa pagkasikop sa tulo ka lalaki nga nalambigit sa ilegal nga droga. Ang mga operasyon gihimo sa lungsod sa San Fernando, Kitaotao, ug Libona.
Sa lungsod sa Kitaotao, usa ka 41-anyos nga lalaki ang nasikop niadtong Hunyo 6, takna alas 8:00 sa gabii sa Purok 2, Barangay Magsaysay.
Narekober gikan posisyon niini ang walo ka sachet sa shabu nga mutimbang og 0.8 gramos kon katugbang sa Php5,440.00, usa ka motorsiklo, ug uban pang personal nga kagamitan.
Nasayran nga kining maong suspek una nang nadakpan niadtong Enero 2016 tungod sa susamang kalapasan.
Samtang, niadtong Hunyo 6, alas 4:38 sa kaadlawon, gidakop sa San Fernando Municipal Police Station ang alyas nga “Kevin,” 36-anyos, didto sa Purok 1, Barangay Halapitan.
Nakuha gikan kaniya ang tulo ka sachet sa shabu nga may timbang nga 0.39 gramos nga adunay standard drug price nga Php2,652.00 ug buy-bust money.
Sa lungsod usab sa Libona, gidakop niadtong Hunyo 7, alas 1:20 sa kaadlawon, ang alyas nga “Cheke,” 30-anyos, sa Purok 3, Barangay Crossing.
Nakumpiska gikan kaniya ang tulo ka sachet sa shabu nga may timbang nga 0.4 gramos nga nagkantidada og Php2,370.00 lakip na ang uban pang ebidensya.
Ang tanang mga dinakpan kasamtangang anaa na sa kustodiya sa tagsa-tagsa ka police station alang sa tukmang disposisyon.