Kapin sa 100,000 ka buhing exotic nga ok-ok ang nasakmit sa mga otoridad sa Australia atol sa operasyon sa Bathurst, nga giila karon isip pinakadakong pagkumpiska sa iligal nga mga invertebrate sa kasaysayan sa nasud.
Lakip sa mga nakumpiska mao ang Madagascar hissing cockroaches ug dubia cockroaches, nga gibanabanaang adunay kantidad nga moabot sa 200,000 Australian dollars.
Gidili sa Australia ang pagpasulod, pagpanag-iya, pagpasanay ug pagpamaligya niining mga espesye tungod sa posibleng risgo niini sa biosecurity ug sa kinaiyahan.
Matud pa sa mga opisyal, wala pa hingpit nga natun-an ang mahimong epekto sa maong mga insekto sa lokal nga ecosystem, ug adunay kahadlok nga mahimo silang makapakaylap og sakit o makadaot sa mga lumad nga mananap.
Gituohang gipadaghan ang mga ok-ok aron mahimong pagkaon sa mga reptilya tungod sa ilang gidak-on.
Apan, gidasig sa gobyerno ang mga tag-iya sa mga exotic pets nga mopili na lamang og alternatibong pagkaon sama sa mga cricket ug wood roaches.
Bisan pa sa dakong kantidad sa mga nakumpiskang insekto, wala pa sa pagkakaron adunay kasong gisang-at batok sa breeder. Samtang, gipaabot sa mga otoridad nga pagapatyon ang maong mga mananap nga ilang narekober.