Gitugutan na sa International Criminal Court (ICC) ang hangyo sa kampo sa kanhi Pangulo Rodrigo Duterte ug sa prosecution nga magdugang og bag-ong ebidensiya nga gamiton sa pagdungog sa kaso.
Sa upat ka panid nga desisyon sa ICC Pre-Trial Chamber 1 nga may petsa Pebrero 10, gimando sa ICC ang depensa ug prosecution nga magsumite sa bag-ong ebidensiya hangtod Pebrero 13.
Una nang gihangyo sa legal team sa kanhi presidente nga magdugang og 78 ka bag-ong ebidensiya aron isumpay sa confirmation of charge.
Wala usab supak sa prosecution, busa gitugutan na kini sa ICC.
Samtang ang prosecution usab naghimo og hangyo nga magdugang og duha pa ka bag-ong ebidensiya, ug misugot usab ang depensa niini.
Lakip usab ang Common Legal Representatives of Victims (CLRV) nga gitugutan ang hangyo sa depensa ug prosecution sa pagdugang og ebidensiya.
Ang maong kamanduan gipagawas pipila ka adlaw sa dili pa magsugod ang confirmation of charges batok sa kanhi pangulo nga nakatakda gikan Enero 23 hangtod 27.
Kahinumduman nga nabilanggo sa facility center sa ICC ang 80-anyos nga si Duterte tungod sa kaso nga crime against humanity nga may kalabotan sa iyang anti-drug operations panahon nga siya ang alkalde sa Davao City ug presidente sa Pilipinas.