 Gipasidunggan isip Best Actor ug Best Actress sila Jericho Rosales ug Maris Racal sa ika-9 nga Entertainment Editors’ Choice Awards o The Eddys nga gipahigayon niadtong Hulyo 5 sa Pasay City.
Nadawat ni Jericho ang Best Actor award alang sa pelikulang “Quezon,” samtang si Maris midaog isip Best Actress alang sa pelikulang “Sunshine.”
Sa iyang acceptance speech, emosyonal nga gipasalamatan ni Jericho ang iyang inahan nga adunay Alzheimer’s, ingon man ang iyang pamilya ug partner nga si Janine Gutierrez.
Samtang si Maris, naghatag og mensahe sa paglaom alang sa mga nag-atubang og bug-at nga pagsulay sa kinabuhi ug giawhag ang tanan nga mobangon ug dili mawad-an og pagsalig sa kaugalingon.
Matud pa niini, bisan unsa pa kakusog ang kasaba sa palibot, hinumdumi lamang kung kinsa ka ug ipadayon ang pagbangon.
Kahinumduman nga nalambigit si Maris Racal sa kontrobersiya niadtong 2024 tali sa aktor nga si Anthony Jennings.
Subay sa maong kalihukan, gipasidunggan usab isip Best Picture ang “Quezon,” ug si Jerrold Tarog isip Best Director.
Ang The Eddys usa ka tinuig nga awarding ceremony sa Society of Philippine Entertainment Editors nga nagpasidungog sa mga matigayonong kalampusan sa industriya sa pelikulang Pilipino.