Gisugdan sa militar sa Israel ang pagguba sa mga tinukod sa mga Palestino sa siyudad sa Hebron, West Bank, human sa pagkamatay sa duha ka sundalong Israeli sa giingong pagpamusil sa duha ka Palestino.
Matud ni Israeli Prime Minister Benjamin Netanyahu, gub-on sa ilang pwersa ang distrito nga gigikanan sa maong mga Palestino ug nangandam usab ang Israel alang sa mas lapad nga operasyon sa West Bank nga ilang giokupahan.
Nasamdan usab ang laing tulo ka sundalong Israeli atol sa insidente sa checkpoint sa gawas sa Hebron, sa wala pa mapusilan ug mamatay ang duha ka Palestino.
Sa miaging mga semana, gikataho usab ang pag-atake sa pipila ka extremist Jewish settlers batok sa mga Palestino nga nagtigom alang sa tinuig nga pag-ani sa olibo, diin pipila kanila ang nasamdan.
Sumala sa United Nations, kapin sa 96 ka Palestino na ang namatay ning tuiga sa West Bank tungod sa mga pag-atake sa Israel, samtang upat ka Israeli ang namatay sa mga pag-atake sa mga Palestino.