Gipasalig sa Bangko Sentral ng Pilipinas (BSP) pinaagi ni Governor Eli Remolona Jr. nga padayon pang palapdan ang pagkab-ot sa mga serbisyong pinansyal human mitaas ngadto sa 58 porsyento ang mga Pilipinong aduna nay financial account base sa pinakabag-o nga SWS survey.
Kini nga ihap mas taas kumpara sa 51 porsyento nga natala sa miaging 2025 BSP Consumer Finance and Inclusion Survey, diin nakit-an ang maong pagsaka sa tanang rehiyon, lebel sa kinitaan, ug kahimtang sa edukasyon.
Gikataho usab sa survey nga 43 porsyento sa mga hamtong ang naggamit na og e-money account, samtang 21 porsyento usab ang aduna nay pormal nga bank account sa nasud.
Sa laing bahin, usa sa matag tulo ka respondents nga walay account ang nag-ingon nga adunay laing miyembro sa ilang panimalay nga nagkupot niini. Bisan pa man sa maayong kalamboan, giangkon sa BSP nga dako gihapon nga babag alang sa uban ang kakulang sa salapi, kawalay trabaho, ug kakulang sa kahibalo kon unsaon pag-abli og account.
Tungod niini, mas gipalig-on pa sa central bank ang ilang mga programa aron masiguro nga ang matag Pilipino mahimong kabahin na sa pormal nga sistema sa panalapi.